“Купальскі фэст” традыцыйна прайшоў у аграгарадку Рудск
Па добрай традыцыі, 7 ліпеня аграгарадок Рудск запрасіў гасцей на свята «Купальскі фэст».
Дзіцячыя фальклорныя калектывы Іванаўшчыны і з іншых раёнаў вобласці прадставілі свае каларытныя творчыя нумары падчас дзейства «Спяваем, танчым, гуляем – Купалку вітаем». Па задуме рэжысёра імпрэзы Уладзіміра Фалітарыка, у сельскую хату да бабы і дзеда завітала вялікая радня. Чацвёра дзяцей і больш за 30 унукаў – майстры на ўсе лады – пацешылі старых песнямі і танцамі.
Яркім момантам свята стала тэатралізаванае шэсце «Купальскі шпацыр», у якім прынялі ўдзел усе творчыя калектывы.
Далей развярнулася забаўляльная праграма. Сваіх гарачых прыхільнікаў сабраў святочна-гумарыстычны сабантуй «Каламбур па-купальску».
І, вядома ж, не абыйшлося без распальвання купальскага вогнішча – сімвалу ачышчэння, жыццёвай сілы і сонца – на беразе ракі Няслухі.
Арганізатары мерапрыемства – работнікі ўстаноў культуры і раённай бібліятэкі – стварылі этнаатмасферу, якая адлюстравала глыбіню і змястоўнасць традыцый, шматграннасць вобразаў і багацце нацыянальнай культуры.
Падчас свята працавалі гандлёвыя рады, былі арганізаваны гульні для дзяцей, кожны мог завітаць на тэматычныя купальскія падворкі і паласавацца пачастункамі.
Зарад энергіі і пазітыву падарыла сталічная кавер-група «Сола бэнд», а завяршыла свята этнадыскатэка «Скокі на ўсе бокі».
Алена Вароніна.