Букет святочных віншаванняў
Так называлася канцэртная праграма, прысвечаная Дню жанчын, якая адгучала сёння ў раённым Цэнтры культуры і народных традыцый. Сапраўды, цудоўны букет з віншаванняў, творчых нумароў і слоў падзякі атрымалі галоўныя героі ўрачыстасці – маці, бабулі, жонкі, сёстры, дочкі і калегі.
З надыходзячым святам прысутных у зале жанчын павіншавалі першы намеснік старшыні – начальнік упраўлення па сельскай гаспадарцы і харчаванні райвыканкама Віктар Бязсілка, старшыня раённага Савета дэпутатаў Рыгор Сыса і старшыня раённай арганізацыі ГА «Беларускі саюз жанчын» Жанна Парфеявец, якія пажадалі ім міру, дабра, шчасця і сямейнага дабрабыту.
Выдатныя яркія нумары прыгожай палове чалавецтва дарылі калектывы мастацкай самадзейнасці Іванаўшчыны, артысты раённага Цэнтра культуры і народных традыцый, дзіцячай школы мастацтваў, харэаграфічнай школы і мадэльнай студыі AS MODELS. У кожным творчым віншаванні была апета жанчына, яе неверагодная грацыя, цяпло сэрца, матчын клопат і мудрасць.
А сапраўдным сюрпрызам для ўсіх гасцей свята стала выступленне беларускага дзяржаўнага акадэмічнага харэаграфічнага ансамбля «Харошкі» са сваімі лепшымі нумарамі.
Валерый Міхальчук.
Фота аўтара.